Perezida Donald Trump wa Leta zunze ubumwe z'Amerika yagiranye ibiganiro na bamwe mu bakuru b'ibihugu by'Afurika ku cyorezo cya virusi ya corona. Abo barimo Perezida Paul Kagame w'u Rwanda na ministiri w'intebe wa Etiyopiya Abiy Ahmed.
Ku rubuga rwe rwa Twitter, Perezida Trump yanditse ko yavuganye na ministiri w'intebe wa Etiyopiya wamugaragarije ko igihugu cye gikeneye imashini zifasha kongerera abanduye virusi ya corona umwuka. Yongeraho ko Amerika iri mu mwanya mwiza wo gufasha Etiyopiya.
Amakuru ku biganiro hagati ye na Perezida Kagame w'u Rwanda, yamenyekanye bwa mbere ku rubuga rwa Twitter rw'umukuru w'u Rwanda wanditse ko yagiranye ibiganiro na mugenzi we w'Amerika. Yavuze ko ibyo biganiro byibanze ku mubano mwiza uri hagati y'ibyo bihugu.
Perezida Kagame yashimiye Perezida Trump ku nkunga Amerika ikomeje gutera u Rwanda mu rugamba rwo guhangana na virusi ya corona.
Facebook Forum