Itora ry’abadepite muri Mali ryabaye nkuko byari biteganyijwe uyu munsi ku cyumweru n’ubwo abarwanyi ba kiyisilamu bari bakangishije urugomo hari n’ubwoba bwa virusi ya corona.
Byari byitezwe ko iki cyiciro cya kabiri cy’itora cyitabirwa n’abantu bake. Icya mbere cyabaye kw’italiki ya 29 y’ukwezi kwa gatatu nyuma yo gusubikwa incuro nyinshi kubera ubwoba bw’abarwanyi ba kiyisilamu bagabye ibitero bakashimuta umuyobozi w’abatavuga rumwe n’ubutegetsi Soumaila Cisse.
Abategetsi bavuga ko muri icyo cyiciro hatoye abari hejuru gato y’ibice 12 kw’ijana mu mujyi wa Bamako. Byari byitezwe ko ubu abantu benshi baguma mu ngo nk’uko amabwiriza abuza abantu guterana ari benshi, akanabasaba gusiga umwanya hagati yabo hagamijwe kubuza virusi ya Corona gukwirakwira.
Kugeza ubu, Mali imaze gutangaza ko abantu 200 barwaye COVID-19. Cumi na batatu bitabye Imana nk’uko kaminuza yo muri Amerika Johns Hopkins ikurikiranira hafi ikwirakwira ry’iyi virusi ibitangaza.
Iri ni itora rya mbere ribaye rigamije kwuzuza imyaka 147 y’inteko ishinga amategeko kuva mu 2013. Itora ryari riteganyijwe mu 2018, ariko ryigijwe inyuma ku mpungenge z’umutekano. Byatumye abanya-Mali benshi bibaza kuri iri tora ryo ku cyumweru ryo ritasubitswe.
Perezida Ibrahim Boubacar Keita wongeye gutorwa mu 2013, mu cyumweru gishize yagejeje ijambo ku banyagihugu yambaye agapfukamunwa, avuga ko icyemezo cyo gukomeza gahunda yateganyijwe y’itora kitafashwe na guverinema ye ko ahubwo ari komisiyo y’amatora yigenga mu gihugu.
Facebook Forum