RDC: Abashingamateka Basaba Irekurwa rya Vital Kamerhe

Muri Republika ya demokrasi ya Kongo, bamwe mu bashingamateka basaba irekurwa rya Vital Kamerhe, umukuru w’ibiro vya Perezida Félix Tshisekedi.

Mw’itangazo ryasohowe n’urunani, UNC, (Union pour la Nation Congolaise), abashingamateka 16 bahurikiye muri urwo runani bateye ivyatsi ihagarikwa rya Vital Kamerhe, basigura ko rinyuranye n’amategeko.

Abo bashingamateka basanga uburyo yahagaritswemwo butabereye umutegetsi ari ku rwego rwiwe. Muri iryo tangazo bavyise « agasuzuguro karengeje ».

Vital Kamerhe, soma mbike wa Félix Tshisekedi, akaba umukuru w’urunani, UNC, ni umwe mu banyepolitike b’ijunja muri Kongo. Yatawe muri yompi ku muhingamo w’uno wa gatatu, inyuma y’amasaha hafi cumi yumvirizwa ku birego vy’ibiturire n’ikoreshwa nabi ry’amafaranga ya reta.

Ni muri dosiye y’imigambi yihutirwa ahanini ifatiye ku gusanura inyubakwa zimwe zimwe n’amabarabara, Perezida Tshisekedi yashizeho akija ku butegetsi mu kwezi kwa gatatu mu 2019.

Vital Kamerhe, ni we yari ajejwe ibikorwa vy’iyo migambi Tshisekedi yitiriye imisi ijana.