Uko wahagera

Trudeau Yatorewe Indi Manda yo Kuyobora Canada


Justin Trudeau, ministiri w'intebe wa Canada

Ministiri w’intebe wa Canada Justin Trudeau yatorewe indi manda y’imyaka ine yo kuyobora igihugu, ariko abura ubwiganze mu nteko ishinga amategeko.

Mu matora yabaye kuri uyu wa mbere, ishyaka rye ry’abaliberali ryegukanye imyanya 157 ku myanya 338 mu nteko. Bari bakeneye nibura imyanya 170 kugira ngo bagire ubwiganze.

Ishyaka ry’abakonservateri bakomeye ku bya kera riyobowe na Andrew Scheer ryegukanye imyanya 121.

Biravugwa ko Trudeau ashobora gufatanya n’ishyaka rya NDP ryabonye imyanya 24 kugira ngo babone ubwiganze mu nteko.

Mu ijambo rye ryo gushima, ministiri w’intebe Trudeau yavuze ko agiye guharanira kuyobora igihugu akiganisha ku iterambere rirambye.

Yavuze ko ibibazo birimo guhangana n’ihindagurika ry’ibihe, biri mu byo ashyize imbere.

Trudeau w’imyaka 47, yagiye ku butegetsi mu 2015. Ise umubyara Pierre Elliot Trudeau nawe yigeze kuba minisitiri w’intebe wa Canada.

Umunyapolitiki ukomoka mu Rwanda, Joseph Hakizimana, wo mu ishyaka NDP wahataniraga guhagararira ifasi y’itora ya Riviere-des-Mille-Iles mu ntara ya Quebec ntiyabonye amahirwe yo kwinjira mu nteko ishinga amategeko.

Muri iyo fasi yatsinzwe na Luc Desilets wo mu ishyaka Bloc Québécois, Hakizimana yaje ku mwanya wa gatatu.

Facebook Forum

XS
SM
MD
LG