Uko wahagera

Afghanistani: Igisasu Cyahitanye Babiri Gikomeretsa 25


Ingabo z'Afuganistani zireba ibyangijwe n'ibisasu byatewe n'abiyahuzi.

Abategetsi bo muri Afuganistani baravuga ko igisasu cyari giteze mu modoka n’igitero cyagabwe n’abitwaje intwaro byahitanye abantu babiri bigakomeretsa abandi 25.

Ababibonye baravuga ko abiyahuzi bitwaje intwaro ziremereye biroshye mu mbuga y’inyubako ikorerwamo n’umutwe wa politike uyobowe na Amrullah Saleh wahoze akuriye iperereza mu gihugu. Ni nawe mu kandida ku mwanya wa Visi Perezida ku ruhande rw’abashyigikiye Perezida Ashraf Ghani mu matora agiye kuba muri icyo gihugu.

Icyo gitero cyagabwe hashize amasaha make Ghani na Saleh bavuye muri mitingi yo kwiyamamaza mu matora y’umukuru w’igihugu.

Abagabye igitero babanje guturitsa imodoka bacira inzira bagenzi babo babona kwinjira muri iyo nyubako. Ingabo z’abakomando z’Afuganistani zahise zihagota ngo zite muri yombi abagabye icyo gitero.

Ministeri y’Ubuzima muri Afuganistani iravuga ko abantu 25 bakomerekeye muri cyo gitero bajyanywe mu mavuriro ya hafi aho.

Kugeza ubu ntawe urigamba icyo gitero ariko umurwa mukuru Kabul umaze igihe wibasiwe n’ibitero bigabwa n’Abatalibani cyangwa abashyigikiye leta ya cy’islamu.

Facebook Forum

XS
SM
MD
LG