Uko wahagera

UNAMID Yongerewe Amezi Ane muri Sudani


Inteko y’Umuryango w’Abibumbye ishinzwe umutekano ku isi uyu munsi yemeje n’amajwi 100% umwanzuro wongerera ingabo z’amahoro muri Darfur, UNAMID, andi mezi ane. Uhagaritse itahuka ry’abasilikali ryari ryaratangiye.

Umushinga w’uyu mwanzuro wateguwe n’Ubwongereza n’Ubudage. Wateje impaka ndende mu bagize inteko. Abanyabulayi n’Abanyafrika (Côte d’Ivoire, Guinee Equatoriale n’Afrika y’Epfo) bari mu nteko bashakaga guhagarika itahuka ry’abasilikali ba UNAMID. Ubushinwa n’Uburusiya bo bashakaga ko rikomeza. Kuri bo, kuba UNAMID iri muri Darfur ni “ukwivanga mu bibazo bwite bya Sudani.”

Nyuma bose baje kumvikana maze UNAMID bayiha ikindi gihe kizarangira ku italiki ya 31 y’ukwezi kwa cumi gutaha.

Hashize umwaka Inteko y’Umuryango w’Abibumbye ishinzwe umutekano ku isi yarafashe icyemezo cyo gucyura buhoro buhoro ingabo za UNAMID ku buryo zigomba kuba zarangije kuva muri Darfur mu mwaka utaha.

UNAMID yashyizweho n’Umuryango w’Afrika yunze ubumwe n’Umuryango w’Abibumbye mu 2007. Isigaranyeyo abasilikali ibihumbi burindwi na 800. Bigeze kuba ari ibihumbi 16.

Facebook Forum

XS
SM
MD
LG