Uko wahagera

USA: Robert Mueller Ntagira Umwere Perezida Trump


Hano muri Leta zunze ubumwe z’Amerika, umushinjacyaha wihariye Robert Mueller yavuze ijambo bwa mbere na mbere ku mugaragaro kuri anketi y’amezi 22 yakoze ku kibazo cyo kwivanga k’Uburusiya mu matora yo mu 2016.

Mueller yavugiye ijambo rye imbere y’abanyamakuru ku cyicaro gikuru cya minisiteri y’ubutabera hano i Washington DC. Ariko arirangije nta kibazo cyabo na kimwe yemeye kwakira.

Yavuze ko muri anketi ye “iyo tuza kuba twarasanze nta cyaha Perezida Trump yakoze, tuba twarabisobanuye ku buryo butomoye.” Gusa yasobanuye ko “kujyana umukuru w’igihugu mu rukiko bidashoboka kubera amabwiriza ya minisiteri y’ubutabera abibuza.”

Minisitiri w’ubutabera, William Barr, na Perezida Trump, bombi bavuga ko bahereye kuri raporo ya Mueller, nta cyaha Donald Trump yakoze. Ariko iyo raporo irondora inshuro nyinshi Perezida Trump yagerageje kubangamira ubutabera.

Robert Mueller, mu ijambo rye, yatangaje ko ibiro bye bifunze imiryango, ko nawe ubwe yeguye ku mirimo ye y’umushinjacyaha wihariye. Yasobanuye ko asubiye kwikorera ku giti cye. Kandi yashimangiye ko atazongera kugira icyo avuga kuri anketi yakoze na raporo ye. Ati: “Iyi raporo ni bwo buhamya bwanjye. Uwashaka kugira icyo ambaza azabe ari yo asoma.”

Facebook Forum

XS
SM
MD
LG