Muri Etiyopiya, minisiteri y’ubucamanza yatangaje ko yashyikirije urukiko dosiye y’uwahoze ari umukuru w’iperereza Getachew Assefa, n’abandi bakozi bo hejuru b’inzego z’ubutasi. Bashinjwa ibyaha by’ubuhotozi n’iyicarubozo. Nk’uko yabisobanuye mu itangazo, 22 bafunze by’agateganyo. Abandi bane, barimo Getachew Assefa, baratorotse. Bazaburanishwa badahari.
Getachew Assefa yategetse ikigo cy’ubutasi n’umutekano cya Etiyopiya, NISS, kuva mu 2001 kugera mu kwa gatandatu 2018. Yakuwe kuri uwo mwanya na minisitiri w’intebe mushya Abiy Ahmed wari umaze amezi abili ku butegetsi. Getachew Assefa aregwa ko yetegetse guhotora no kwica urubozo abataravugaga rumwe n’ubutegetsi. Muri uko kwezi kwa gatandatu, Abiy Ahmed yatangaje ku mugaragaro ko NISS yakoze iyicarubozo, “abigereranya n’iterabwoba rikorwa n’inzego za leta.”
Mu kwezi kwa mbere gushize, minisitiri w’ubucamanza wa Etiyopiya, Berhanu Tsegaye, yareze leta ya Tigreya, imwe mu zigize igihugu cya Etiyopiya, gucumbikira no gukingira ikibaba Getachew Assefa. Ariko mu kwezi kwa kane gushize, perezida wa Tigreya, Debretsion Gebremichael, yarahiye ko atazi aho Getachew Assefa aherereye. Assefa nawe akomoka muri Tigreya.
Facebook Forum