Uko wahagera

RDC: Abakekwaho Kwica Abakozi ba ONU Batorotse Gereza


Impuguke za ONU zishwe muri Kongo mu mwaka wa 2017

Muri Repubulika iharanira demokarasi ya Congo, abantu batatu mu bakekwaho kwica abakozi babili ba ONU mu 2017 baraye batorotse mu ijoro ryakeye. Bari bafungiye by'agateganyo muri gereza nkuru yo mu mujyi wa Kananga, mu ntara ya Kasai Central.

Avoka wa babili muri bo, Me Trésor Kabangu, yatangarije ibigo ntaramakuru AFP cyo mu Bufaransa na Reuters cyo mu Bwongereza, ati: “Parike ya gisilikali yamenyesheje ko abakiliya banjye Évariste Ilunga Lumu na Tshiaba Kanowa n’uwo bari bafunganywe Mbayi Amoxi Tshikangu bacitse muri iri ijoro.”

Abakozi babili ba ONU, Zaida Catalan, wari ufite ubwenegihugu bwa Suede, n’Umunyamerika Michael Sharp, bishwe ku italiki ya 12 y’ukwa gatatu mu 2017 muri Kasai aho barimo bakora anketi ku byobo byahambwemo imirambo y’abantu benshi bashobora kuba barishwe mu ntambara hagati y’ingabo za leta n’umutwe witwara gisilikali witwa Kamuina Nsapu.

Urubanza rw’abakekwaho kwica aba bakozi babili ba ONU rwatangiye ku italiki ya 5 y’ukwa gatandatu 2017. Ariko n’ubu ntirurinjira mu mizi yarwo. Abantu 14 ni bo bakurikiranwe. Barimo umusilikali mukuru wa leta ufite ipeti rya Colonel n’umukozi wo mu nzego z’iperereza.

Urukiko rwa gisilikali rufite uru rubanza rwari rwarateganije ko iburanisha rizasubukurwa kuri 16 y’uku kwezi. Ilunga Lumu yari yaremereye abagenzacyaha ko yagize uruhare mu kwica abakozi ba ONU.

Florence Marchal, umuvugizi w’umutwe w’ingabo za ONU muri Congo, MONUSCO, we yatangaje ko gutoroka kwa bariya bagabo batatu byerekana “imikorere mibi ya gereza n’abasilikali bayirinda.”

Facebook Forum

XS
SM
MD
LG