Uko wahagera

Kongo Yafashe Umwe mu Bakuriye Imitwe y’Inyeshyamba


Ikarita y'igihugu cya Kongo

Igisirikare cyo muri Repubulika Iharanira Demokarasi ya Kongo kiravuga ko cyafashe umukuru w’umwe mu mitwe y’inyeshyamba ushinjwa ibyaha byo gufata ku ngufu n’ibindi byibasiye inyoko muntu.

Umuvugizi w’igisirikare cya Kongo Dieudonne Kasereka yavuze ko Masudi Alimasi Kokodiko, wayoboraga umutwe w’abarwanyi utinywa cyane witwa Raia Mutomboki, yafatiwe ahitwa i Shabunda mu ntara ya Kivu y’amajyepfo ku wa kabiri. Yavuze ko yafashwe amaze gukomerekera mu mirwano.

Umutwe wa Raia Mutomboki washinzwe mu 2005 ugamije kurwanya undi mutwe w’inyeshyamba z’Abanyarwanda b’Abahutu bari mu burasirazuba bwa Kongo. Wahindutse umwe mu mitwe y’inyeshyamba ikomeye muri ako gace gakungahaye ku mabuye y’agaciro gahana imbibe n’u Rwanda, Uganda n’Uburundi.

Raporo yasohowe n’impuguke z’Umuryango w’Abibumbye umwaka ushize yavuze ko abarwanyi bayobowe na Kokodiko bafashe ku ngufu abagore n’abakobwa bagera kuri 17 mu mugi wa Lubila mu kwezi kwa cyenda umwaka ushize.

Mu mwaka wa 2012 ubushakashatsi bwagizwemo uruhare n’Umuryango w’Abibumbye bwagaragaje ko umutwe wa Raia Mutomboki ufatanyije n’izindi nyeshyamba bishe abasiviri 260 mu mirwano y’amoko yabaye mu ntara ya Kivu y’Amajyaruguru.

Perezida mushya wa Repubulika iharanira Demokarasi ya Kongo, Felix Tshisekedi, wagiye ku butegetsi mu kwezi kwa mbere yasezeranije abaturage kuzarangiza ikibazo cy’umutekano muke uterwa n’imitwe y’abarwanyi. Intambara z’iyo mitwe zimaze guhitana ababarirwa muri za miliyoni.

Facebook Forum

XS
SM
MD
LG