Uko wahagera

Impanuka ya Ethiopian Airlines Yahitanye Abantu 157


Ibisigazwa by'indege ya Ethiopian Airlines yahanutse mu majyepfo ya Addis Ababa, umurwa mukuru wa Etiyopiya, Italiki 10/03/2019.

Indege y’isosiyeti Ethiopian Airlines yari iturutse Addis Abeba muri Etiyopiya yagize impanuka igihe gito imaze guhaguruka ku butaka uyu munsi ku cyumweru. Abantu bari bayirimo 157 bitabye imana.

Ibiro bishinzwe itangazamakuru bya leta ya Etiyopiya, byavuze ko iyo ndege yaguye hafi y’umujyi wa Bishoftu. Yarimo abagenzi baturukaga mu bihugu 33.

Mu basize ubuzima muri iyo mpanuka barimo Abanyakenya 32, Abanyakanada 18, Abanyetiyopiya 9, Abashinwa 8, Abataliyani 8, Abanyamerika 8, Abongereza 7, Abafaransa 7, Abanyamisiri 6, Abaholandi 5, abantu bane bari bafite passiporo za ONU, Abahinde 4, Abarusiya 3, Abanyamaroke 2, Abanya-isiraheli 2, Umubirigi, Umunyarwanda, Umunya-ganda, Umunyasudani, Umunyasomaliya, Umunyamozambique, Umunyayemeni n'abandi.

Iminota itandatu gusa, iyo ndege imaze guhaguruka ku kibuga cy’indege Bole International Airport, uyu munsi ku cyumweru, mu saa mbiri n’iminota 38 kw’isaha yaho, ntabwo abari bayitwaye bari bakibasha kuvugana n’abashinzwe kuzigenzura.

Minisitiri w’intebe Abiy Ahmed yacishije ubutumwa kuri Twitter, avuga ko ibiro bye mw’izina rya guverinema n’abaturage ba Etiyopiya, bifuje gutanga ubutumwa bw’akababaro gakomeye bifatanya n’imiryango yabuze abayo muri iyo mpanuka y’indege ya Ethiopian airlines Boeing 737. Yari igiye I Nairobi muri Kenya mu gitondo cyo kuri uyu munsi ku cyumweru.

Perezida w'u Rwanda Paul Kagame nawe kuri Twitter, yanditse ubutumwa bwo kwihanganisha imiryango n'incuti babuze ababo muri iyo mpanuka. Yabwiye minisitiri Abiy n'abaturage ba Etiyopiya. Ati:Turi kumwe,"Turabatekereza".

Iyo Boeing 737 – MAX 8 yari nshya kuko yageze mw’isosiyete mu kwezi kwa 11. Byatangajwe na Afrat Begashaw, umuvugizi wa Ethiopian Airlines. Yabibwiye Ijwi ry’Amerika yongeraho ko uwashaka kugira ikindi gisobanuro icyo aricyo cyose atanga ku cyatumye iyo ndege ihanuka, byaba ari “ugushakisha”.

Mw’itangazo ry’umurongo umwe Boeing yasohoye uyu munsi cyumweru, yavuze ko yagejweho amakuru y’iyo mpanuka y’indege kandi ko irimo kubikurikiranira hafi.

Facebook Forum

XS
SM
MD
LG