Buhari ari Imbere mu Majwi y'Amatora ya Perezida muri Nijeriya

Amatora y’umukuru w’igihugu muri Nigeria y’ejobundi kuwa gatandatu: Komisiyo y’amatora yatangaje amajwi make cyane ya mbere y’ibanze. Ivuga ko Perezida Muhammahu Buhari ari we uri imbere.

Amajwi amaze kubarurwa ni ayo muri leta ebyili, Ekiti na Osun, zo mu majyepfo y’igihugu. Nigeria igizwe na leta 36 n’intara y’umurwa mukuru.

Nk’uko Komisiyo y’amatora yabishyize ku rubuga rwayo rwa Twitter, Buhari yatsinze n’amajwi 57% muri leta ya Ekiti. Naho muri leta ya Osun, Buhari arusha uwa mbere mu bo bahanganye, Atiku Abubakar, amajwi ibihumbi icumi.