Uko wahagera

Amerika na Colombiya Bashaka Gukuraho Maduro

update

Perezida w'Amerika, Donald Trump, n'uwa Colombiya, Ivan Duque, baganira n'abanyamakuru muri White House ku italiki ya 13 y'ukwa kabili 2019.

Perezida wa Leta zunze ubumwe z’Amerika, Donald Trump, yakiriye aho akorera muri White House mugenzi we wa Colombiya, Ivan Duque, kuri uyu wa gatatu. Mu byo baganiriyeho harimo ikibazo cya Venezuela, igihugu gituranye na Colombia.

Barangije inama yabo baganiriye n’abanyamakuru. Perezida Duque yavuze, ati: “Turashaka kurangiza ingoma ngome y’igitugu [cya Perezida Nicolas Maduro] muri Venezuela.” Perezida Trump yateye mu rye, ati: “Abaturage ba Venezuela bari mu kaga. Si byiza na gato.” Yasobanuye ko arimo yiga igikwiye gukorwa, ariko yirinze kwinjira mu mizi yabyo. Mu minsi ishize nyamara, Perezida Trump yigeze kuvuga ko mu byo yakora hashobora kwinjiramo n’ingufu za gisilikali.

Leta zunze ubumwe z’Amerika na Colombiya ni bimwe mu bihugu bishyigikiye perezida w’inteko ishinga amategeko ya Venezuela, Juan Guaido, uvuga ko ari we mukuru w’igihugu wemewe, ariko by’agateganyo.

Perezida Trump yavuze ko Guaido ari intwari, yongeraho, ati: “Mfite icyizere ko gukuraho Maduro bizakunda”. Perezida Duque nawe, ati: “Dukwiye gutiza Guaido imbaraga kurushaho kugirango ayobore Venezuela.”

Abayobozi bombi bamaganye icyemezo cya Perezida Maduro cyo gukumira imfashanyo z’ibiribwa n’imiti zaheze ku mupaka wa Colombia. Perezida Trump, ati: “Ni ubugome rwose kuko abantu barimo baricwa n’inzara.” Mugenzi we Duque nawe, ati: “Kubuza imfashanyo kwinjira ni ubwicanyi bwibasiye inyokomuntu.”

Guaido yemeza ko imfashanyo, zatanzwe ahanini na Leta zunze ubumwe z’Amerika, zizinjira muri Venezuela ku italiki ya 23 y’uku kwezi kwa kabili, “Perezida Nicolas Maduro yabishaka atabishaka.” Naho ubundi, nizitahagera, “abantu barenga ibihumbi 300 bazapfa bazize inzara,” nk’uko yabivuze.

Colombiya ni cyo gihugu cyakiriye abaturage benshi ba Venezuela bahunze kubera inzara n’ubukene. Umuryango w’Abibumbye wemeza ko abaturage bose hamwe barenga miliyoni eshatu bahunze Venezuela kuva mu 2015.

Facebook Forum

XS
SM
MD
LG