Muri Sudani, abaturage basubiye mu myigaragambyo uyu munsi bagisohoka mu musigiti nyuma y’isengesho ryo kuwa gatanu mu mujyi wa Omdourman. Polisi yabarashemo ibyuka biryana mu maso kugirango ibanyanyagize.
Sadek al-Mahdi yavugiye ijambo mu musigiti. Nk’uko ikigo ntaramakuru AFP cyo mu Bufaransa kibitangaza, yavuze ko “ubutegetsi bugomba kuvaho bidatinze,”
Sadek al-Mahdi yemeje ko abantu barenga 50 bamaze kugwa mu myigaragambyo kuva igitangira ku italiki ya 19 y’ukwezi gushize. Leta ya Sudani yo ivuga ko abayipfiriyemo ari 30. Naho imiryango iharanira uburenganzira bwa muntu itanga umubare w’abantu 40 biciwe mu myigarambyo.
Sadek al-Mahdi ayobora ishyaka ryitwa al-Oumma. Yari minisitiri w’intebe watowe n’abaturage ubwo General Omar el-Béchir yamuhirikaga ku butegetsi muri coup d’Etat yo mu 1989.
Kugeza ubu, imyigaragambyo yakoreshwaga n’amashyirahamwe y’abanyamwuga atandukanye. Ni ubwa mbere ishyaka rya politiki ryifatanije n’aya mashyirahamwe. Abaturage bigaragambya basaba ko Perezida Beshir yegura.
Facebook Forum