Uko wahagera

ONU Iratabariza 900 Bishwe muri Kongo mu Kwezi Gushize


Madame Michele Bachelet ni we muyobozi w'ishami rya ONU ryita ku burenganzira bwa muntu.
Madame Michele Bachelet ni we muyobozi w'ishami rya ONU ryita ku burenganzira bwa muntu.

Ishami ry’umuryango w’abibumbye ryita ku burenganzira bwa muntu riratangaza ko abantu hafi 900 bishwe mu kwezi gushize muri Repubulika iharanira demokarasi ya Kongo.

Mu itangazo, iryo shami rivuga ko amakuru yizewe bafite agaragaza ko abantu 890 bishwe hagati y’amatariki ya 16-18 y’ukwezi kwa cumi na kabiri mu duce tune twa teritwari ya Yumbi iri muri ntara Mai-Ndombe mu burengerazuba bwa Kongo. Bivugwa ko abantu barenga 16,000 bamaze kuva mu byabo. Benshi bahungiye muri Kongo Brazzaville.

Umuyobozi w’ishami ry’umuryango w’abibumbye ryita ku burenganzira bwa muntu, Michelle Bachelet, avuga ko iryo shami ryatangije iperereza kuri ubwo bwicanyi bw’ikivunge.

Mu ntangiriro ry’iki cyumweru, umupadiri mu gace ka Yumbi yavuze ko ubwicanyi bw’abantu 400 ari bwo bwaviriyemo guhagarika ibikorwa by’amatora muri ako gace.

Ntibiramenyekana niba ubwo bwicanyi hari aho buhuriye n’amajwi yavuye mu matora y’umukuru w’igihugu aheruka gutangazwa.

Facebook Forum

XS
SM
MD
LG