Uko wahagera

USA: Inteko Ishinga Amategeko Nshya Izahangana na Trump


Depite Nancy Pelosi ni we uzayobora inteko ishinga amategeko y'Amerika mu gihe cy'imyaka ibiri iri imbere

Muri Leta zunze ubumwe z’Amerika, Congress - inteko ishinga amategeko nshya yatowe mu kwa 11 gushize irarahira, itangire imilimo yayo, mu kanya gato kari imbere.

Nyuma y’imyaka ibili yari imaze yiganjemo abo mu ishyaka ry’Abarepubulikani, umutwe w’abadepite wo uraba wiganjemo Abademokarate. Naho Sena yagumye mu maboko y’Abarepubulikani.

Depite Nancy Pelosi, umwe mu bahagarariye leta ya California, arahabwa amahirwe menshi yo kuba perezida w’umutwe w’abadepite. Yigeze kuba muri uyu mwanya guhera mu 2007 kugera mu 2011. Ni we mutegarugoli wenyine wayoboye umutwe w’abadepite wa Congress.

Perezida w’umutwe w’abadepite ni we muntu wa gatatu mu buyobozi bw’igihugu inyuma ya perezida wa Repubulika na visi-perezida wa Repubulika.

Congress itangira imilimo yayo uyu munsi ni yo ya mbere mu mateka y’Amerika irimo abantu b’ingeli nyinshi zitandukanye. Ni yo ya mbere irimo abategarugoli benshi: 102 mu badepite, na 25 muri Sena. Irimo depite Alexandria Ocasio-Cortez wa mbere muto mu myaka mu mateka. Afite imyaka 29 y’amavuko. Ni umwe mu bahagarariye leta ya New York.

Depite wa leta ya Michigan Rashida Tlaib na depite wa leta ya Minnesota Ilhan Omar ni bo Bayisilamukazi ba mbere na mbere binjiye muri Congress. Naho depite wa leta ya New Mexico Deb Haaland na depite Sharice Davids wa leta ya Kansas ni bo basangwabutaka ba mbere na mbere batowe. Congress nshya irimo kandi abantu icumi bemeye ku mugaragaro ko bakundana n’abo bahuje igitsina.

Inteko ishinga amategeko irahita ihura n’ikibazo cy’imilimo imwe n’imwe ya guverinoma imaze iminsi 13 yarahagaze. Inteko ishinga amategeko na Perezida Trump barananiwe kumvikana ku ngengo y’imali ya leta.

Uretse iki kibazo, abadepite b’Abademokarate bashobora gutangiza ibikorwa byo kugenzura imikorere ya guverinoma ya Perezida Trump, n’iye bwite. By’umwihariko, nabo bashobora gukora anketi ku birego by’uko Uburusiya bwaba bwaramufashije gutsinda amatora yo mu 2016.

Facebook Forum

XS
SM
MD
LG