Uko wahagera

Umubare w’Abahitanywe n’Ibisasu muri Somaliya Ugeze kuri 52


An injured civilian walks away from the scene after being wounded in a bomb blast near the Sahafi hotel in the capital Mogadishu, Somalia, Nov. 9, 2018.

Umubare w’abahitanywe n’ibisasu byaturikije amamodoka ku wa gatanu mu murwa mukuru wa Somaliya umaze kugera kuri 52. Iyi ni imibare itangwa hakurikijwe ibitaro bitanu bakiriwemo.

Abagize inzego z’umutekano muri Somaliya batabaye kw’ikubitiro. Baravuga ko abarwanyi bane binjiye mw’ihoteli bagahagarara hejuru ku gisenge maze bakamisha urusasu ku bari hasi. Bavuze ko byaje kurangira abashinzwe umutekano bishe abo bari bagabye igitero bakanabasha kurokora abantu bari mu byumba by’ihoteli.

Umutwe w’abarwanyi ba al-Shabab umaze imyaka irenga 10 ugaba ibitero bihungabanya umutekano wigambye icyo gikorwa.

Ibi bisasu byaturitse bikurikirana byibasiye “Hotel Sahafi” iri mu murwa mukuru Mogadishu n’uduce tuwukikije. Iyo hoteli iri hafi y’ibiro bikuru by’igipolisi cya Somaliya bishinzwe iperereza nshinjabyaha.

Abaganga n’abayobozi b’ibitaro bitanu biri muri uwo mujyi ari byo Medina, Darul Shifa, Erdogan bakunze kwita Digfer, Kalkaal hamwe n’ibitaro byitwa “Somalia Sudanese” ahavurirwa abakomerekejwe n’ibyo bisasu, baravuga ko bimaze guhitana abagera kuri 52 bikaba byakomerekeje abagera ku 106.

Uwiboneye iby’icyo gitero n’amaso wari kuri iyo hoteli ariko utashatse ko izina rye ritangazwa yavuze ko ibyo bisasu byasenye urwinjiriro rw’iyo hoteli.

Abdi Barre Jibril wahoze ari umudepite yavuze ko abagore n’abana bari mu bahitanywe n’ibyo bisasu. Avugana n’Ijwi ry’Amerika yagize ati: “abagore babiri n’umwana w’imyaka umunani bari mu bapfuye”.

Facebook Forum

XS
SM
MD
LG