Uko wahagera

Amatora y'Amerika Ashobora Kuba Kamarampaka kuri PerezidaTrump


Itora muri Amerika tariki ya 6/11/2018

Abaturage hirya no hino muri Leta Zunze Ubumwe z’Amerika bazindukiye ku biro by’itora aho bagiye kwitorera abagize inteko ishinga amategeko, Sena na ba Guverineri ba za leta. Byiteguwe ko imyanzuro y’amatora y’uyu munsi ishobora kuzana impinduka zikomenye ku miyoborere ya Perezida Donald Trump mu myaka ibiri iri imbere.

Muri iyi minsi ishize ubwo amashyaka ahanganye yamamazaga abakandida, perezida Trump yibasiye cyane ishyaka ry’abademokarate abashinja uruhare mu korohera abamukira binjira mu gihugu. Ni nako Perezida Trump yibasiraga itangazamakuru avuga ko atari itangazamakuru ahubwo ari itangazabinyoma kandi ko ibyo rivuga byose ntacyo bimubwiye we azakomeza gahunda ze zo gukoma imbere abimukira yita nk’abagaba igitero ku gihugu ayobora.

Uwahoze ari perezida w’Amerika Barack Obama, nawe yakajije umurego mu kwamamaza abakandida b’ishyaka akomokamo ry’abademokarate. Kuwa mbere, ubwo yari mu ntara ya Illinois yibukije abaturage ko mu gihe bakwitabira amatora y’uyu munsi bagatora neza, bashobora kwigaranzura politiki ya Perezida Trump. Obama avuga ko iyo politiki ya Trump ishingira ku macakubiri n’ubwoba abiba mu baturage abangisha abaturanyi babo badahuje imyumvire.

Ibigereranyo by’ibanze bigaragaza ko ishyaka ry’abademokarate rishobora kwegukana imyanya myinshi mu nteko ishinga amategeko kimwe na ba Guverineri cyane cyane kubera ko bitabiriye amatora ku kigero kinini kurusha abakomoka mu ishyaka ry’abarepubulikani.

Mu myaka ibiri ishize Perezida Trump ari ku butegetsi inteko ishinzwe amategeko yari ifite ubwiganze bw’abadepite bakomoka mu ishyaka ry’abarepubulikani yamufashije cyane gushyira gahunda ze mu bikorwa. Mu gihe habaho impinduka abademokarate benshi bakegukana imyanya myinshi mu nteko ishinga amategeko, ibyemezo Perezida Trump afata byazajya bibanza kumvikanwaho n’amashyaka yombi kugira ngo bishyirwe mu bikorwa.

Ariko kandi ku rwego rwa Sena biravugwa ko ishyaka ry’abarepubulikani ryaza kwegukana intebe nyinshi kurusha ishyaka ry’abademokarate.

Facebook Forum

XS
SM
MD
LG