Abategetsi muri Afuganistani batangaza ko, mu misi ine bamaze bagwanya umugwi w'abatalibani mu gisagara ca Ghazni mu karere k’ubumanuko bushira ubuseruko bw’igihugu, hamaze gupfa abasirikare ba reta ijana hamwe n’abasivile mirongo itatu.
Umushikiranganji ajejwe kwivuna abansi General Tariq Shah Bahrami, yavuze ko inzego z’umutekano za reta zifashijwe n’ibitero vyo mu kirere vyagizwe n’ibihugu bicuditse na Afuganistani bishe abagwanyi bashika ku majana abiri. Mu bishwe harimwo abarabu, abanyechecheni , n’abanyagihugu baturuka muri Pakistani.
General Bahrami ararahira ko bagiye ku garura umutekano w’iyo ntara mu misi mike, inyuma y'aho bazoba bomoye abatalibani.