Raporo iheruka y’umwaka wa 2017 y’ikigega cy’umuryango w’abibumbye ishami ryita ku bana UNICEF, yagaragaje ko uyu mwaka wagize umwihariko w’uko abana bafatiwe mu rugomo. Abana mu mpande zose z’isi bahuye n’urugomo rukabije rw’impande zari mu ntambara.
UNICEF ivuga ko nta rwinyagamburiro ku bana bafatiwe mu ntambara. Raporo y’iri shami rya ONU, yerekanye ko abana bibasiwe kandi ko batezwe ibitero n’urugomo rwabasanze mu ngo iwabo, mu mashuri yemwe no ku bibuga bakiniraho. Ibyo byakozwe hirengagijwe amategeko mpuzamahanga yashyiriweho kurengera abatishoboye.
Iyo raporo igaragaza ihohotera ryabaye mu bushyamirane mu mpande zose z’isi, muri Afurika, mu burasirazuba bwo hagati, muri Aziya yemwe no mu Bulayi hamwe no mu burasirazuba bwa Ukraine. Iyo raporo inerekana ukuntu abana bibisiwe n’ababigambiriye. Bakoreshejwe nk’ingabo zo kwikingira. Barashimiswe bagirwa abacakara. UNICEF ivuga ko ibyo byose byagize ingaruka ku buzima bwabo bwo mu mutwe kandi ko bahungabanye.
UNICEF yasanze abana 850,000 barakuwe mu ngo z’ababyeyi mu ntara ya Kasai muri Repubulika Iharanira demokarasi ya Congo. Abarenga ibihumbi 19 bagizwe abasilikare n’imitwe yitwaje intwaro muri Sudani y’Epfo no mu majyaruguru ashyira uburasirazuba bwa Nijiriya na Kameruni. Abandi bana byibura 135 bakoreshejwe mu gutega bombe z’ubwiyahuzi.
Facebook Forum