Reta Zunze Ubumwe za Amerika zatangaje kur'uyu wa gatatu, ko igitero c’indege z’ingwano zayo cishe abarwanyi b’umurwi al-Shabab cumi na batatu.
Ico gitero cakozwe ku musi w’Imana mu bumanuko bwa Somaliya.
Ibiro bikuru vy’igisirikare ca Amerika mu karere ka Afrika, AFRICOM, vyatangaje kw’inteko za Amerika, zikoranye na Reta ya Somaliya, zakoze igitero c’indege ku barwanyi b’umuhari wa al-Shabab mu gitondo co ku musi w’Imana mu bumanuko bwa Somaliya. Ibiro AFRICOM bimenyesha kw’abagira iterabwoba cumi na batatu bishwe.
Reta Zunze Ubumwe za Amerika zarongereje ibikorwa vyazo vya gisirikare muri Somaliya mu ndwi nkeyi zirangiye. Zakoresheje indege zitagira abadereva ku barwanyi b’umurwi al-Shabab.
Abarwanyi b’umuhari al-Shabab baracagenzura ibice binini vyo hagati muri Somaliya. Bagira ibitero kenshi ku murwa mukuru, Mogadisho no mu bibanza vya gisirikare vya Reta ya Somaliya, n’ibibanza vya gisirikare vy’inteko zo mu mahanga.
Facebook Forum