Kenya Yaciye Imyigaragambyo mu Mijyi Minini Itatu

Mu gihe ishyaka ritavuga rumwe n’ubutegetsi bwa Kenya rirahirira gukora imyigaragambyo isaba amavugurura mbere y’uko itora rya perezida risubirwamo, guverinema yatanze itegeko rica imyigaragambyo mu mijyi minini itatu. Iyo ni Mombassa, Kisumu, n’umurwa mukuru Nayirobi. Guverinema ibona iyo myigaragambyo yahungabanya umutekano igateza amakuba.

Iyo mijyi yose uko ari itatu yiganjemo abayoboke bashyigikiye uwari umukandida utavuga rumwe n’ubutegetsi Raila Odinga. Uyu yavuye mu cyiciro cya kabiri cy’itora riteganyijwe kw’italiki ya 26 y’uku kwezi kwa cumi. Yasobanuye ko yabitewe n’uko urwego rw’igihugu rushinzwe amatora rutasimbuye abayobozi bamaganirwaho ibitaragenze neza mw’itora rya perezida riheruka.

Tubibutse ko ejo kuwa gatatu, Abanyakenya ibihumbi bakoze imyigaragambyo mu mihanda y’i Nayirobi, umunsi umwe nyuma y’uko Odinga atangaje ko atazitabira icyiciro cya kabiri cy’iryo tora.