Reta Zunze Ubumwe za Amerika yatangarije k’umugaragaro Ishirahamwe Mpuzamakungu ONU ko ifise umugambi wo kuva mu masezerano y’I Paris, ajanye n’ibidukikije, yamara ko ishobora gusubiramwo ari hamwe ibiri mur’ayo masezerano bihindutse, Amerika ikabigiramwo inyungu.
Departema ya Amerika yatangaje, kur’uyu wa gatanu, ko Amerika izobandanya ibiganiro n’ibindi bihugu, mu gihe izoba iriko iriga uburyo bwo kuyavamwo, mu kiringo Amerika ivuga ko kitazorenga imyaka itatu. Amerika imenyesha kandi ko ishigikiye umugambi woza unganisha inyungu za bose, ukongera ukaduza umwimbu hamwe ukurinda n’umuyagankuba.
M’ukwezi kwa gatandatu niho Prezida Donald Trump yatangaza ko Amerika ikuye akarenge mur’ayo masezerano, amenyesha ko arenganya abanyagihugu ba Reta Zunze Ubumwe za Amerika. N’amasezerano yari yateweko igikumu na Amerika mu bihumbi bibiri na cumi na gatanu. Mur’ayo masezerano, Amerika yari yiyemeje ko gushika mu bihumbi bibiri na mirongo ibiri na gatanu, izoba imaze kugabanya ivyuka ikoresha ku bice biri hagati ya mirongo ibiri na gatandatu na mirongo ibiri n'umunani kw’ijana.
Facebook Forum