Uruzinduko rwa Dalai Lama, umunya Thibeti utavuga rumwe n’ubutegetsi bw’Ubushinwa, mu gihugu cya Botswana, rushobora gutera umwuka mubi hagati y’ibihugu byombi.
Dalai Lama ategerejwe muri Botswana kuva tariki ya 17 kugeza kuya 19 uku kwezi. Azitabira inama ku burenganzira bwa muntu izabera mu murwa mukuru Gaborone. Jeff Ramsey, umuvugizi wa guverinoma ya Botswana avuga ko uruzinduko rwa Dalai Lama ntaho ruhuriye na politiki n’ubwo ashobora no kuzabonana na Perezida w’icyo gihugu.
Abakurikiranira hafi politiki ya Botswana basanga hashobora kuba umwuka mubi hagati ya Botswana n’Ubushinwa mu gihe perezida wa Bostwana yabonana na Dalai Lama. Ubushinwa bwagiye buhagarika umubano wabwo n’ibihugu bitandukanye, birimo n’Ubwongereza bwakiye Dalai Lama mu mwaka w’2012.
Kugeza ubu Ubushinwa ni bwo butanga imfashanyo n’inguzanyo nyinshi ku gihugu cya Botswana.
Facebook Forum