Uko wahagera

Abdoulaye Wade, wigeze kuyobora igihugu cya Senegali, yongeye kugaruka mu ruhando rwa Politiki nyuma y’imyaka igera kuri itanu aba mu Bufaransa.

Uyu mukambwe w’imyaka 91 y’amavuko, yayoboye Senegal kuva mu mwaka w’2000 kugeza mu 2012, atsinzwe mu matora na Perezida uriho ubu Macky Sall. Icyo gihe Wade yifuzaga kuyobora manda ya gatatu.

Abdoulaye Wade, agarutse muri iki gihugu gushyigikira ishyaka PDS, riharanira demokarasi muri Senegali, ari naryo abarizwamo. Ubu ari ku rutonde rw’abakandida iri shyaka rishyize imbere mu guhatanira imyanya mu nteko ishingamategeko, mu matora ateganijwe mu mpera z’uku kwezi.

Wade wakiriwe n’intsinzi ry’abantu ubwo yageraga ku kibuga cy’indege mu murwa mukuru Dakar. Yaherukaga muri Senegali, mu mwaka w’2014, mu rubanza rw’umuhungu we Karim Wade. Uyu yashinjwaga ibyaha bya ruswa no kunyereza imitungo nyuma aza guhabwa imbabazi na Perezida Macky Sall. Biteganijwe ko Wade azazenguruka igihugu ari kumwe n'abayoboke b’ishyaka rye biyamamaza.

Facebook Forum

XS
SM
MD
LG