Imyigaragambyo Yibasiye Inama y'Ibihugu bya G20 i Hamburg

Ku munsi wa nyuma w'inama y'abakuru b'ibihugu 20 by'ibihangange kw'isi, umujyi wa Hamburg mu Budage waranzwemo imigaragambyo ikaze.

Nyuma y'ubushyamirane hagati y'abigaragambya na polisi mu museso, abantu 13 ni bo batawe muri yombi. Byari byitezwe ko imyigaragambyo ya simusiga, ihuruza abantu ibihumbi 30, iba mu masaha yo ku gicamunsi.

Ejo kuwa gatanu, abigaragambya basakiranye na polisi, bituma abantu, barimo n'abapolisi 200 n'abigaragambya mirongo, bakomereka. Ubuyobozi bwa polisi bwatangaje ko bwasabye inkunga y'abapolisi 900, bituma umubare wose wabo ugera ku bihumbi 20.

Chanceliere w'Ubudage Angela Merkel yavuze ko iyo myigaragambyo itemewe. Polisi yagiye ikoresha ibimodoka bitera amazi kugira ngo ikumire abigaragambya. Ku ruhande rwabo, abo bakoreshaga za bombe zikoreshwa lisansi, gutwika imipira y'imodoka mu mihanda ndetse no gusahura amazu y'ubucuruzi.

Kugeza ubu, abigaragambya bagera kuri 70 ni bo bamaze gutabwa muri yombi.