Reta ya Etiyopiya yarekuye abanyagihugu bashika ku ibihumbi bine na mirongo itatu na batanu, bari batawe mu mvuto mu kiringo kidasanzwe co kugarukana umutekano. Abo banyagihugu bakazorekugwa babanje kuronswa inyigisho, nkuko vyatangajwe n’Ikinyamakuru Fana Broadcasting Network.
Abo banyagihugu bari bapfungiwe mu karere ka Tolay, m’ubumanuko bushira ubungero bwa Etiyopiya, mu makambi y’igisirikare. Mu ntango z’iyi ndwi Reta ya Etiyopiya yari yatangaje ko abashika ku ibihumbi icenda n'amajana umunani, aribo bafashwe, yongera ivuga ko mur’abo abashika ku bihumbi bibiri n'amajana ane na mirongo ine n'icenda bazorengutswa imbere y’ubutungane.
Umuhsikiranganji wa mbere wa Etiyopiya yabwiye abari barekuwe ko bafise uburenganzira bwo gukora imyiyerekano, yamara ko batemerewe gutera umudugararo. Umushikiranganji ajejwe gutumatumanako amakuru muri Etiyopiya, Negeli Lencho, yatangaje ko hashinzwe umugwi wo kwiga ku bijanye n’ihohoterwa ry’agateka ka zina muntu ryoba ryarabaye mu gihe c’imyiyerekano. Lencho avuga ko ata muntu ari hejuru y’amategeko.
Tubibutse ko muri Etiyopiya haheze ikiringo c’umwaka harangwa imyiyerekano iturutse k’umugambi wa Reta wo gusubiramwo itunganywa ry’uturere. Uwo mugambi ukaba utemerwa n’abanyagihugu.