Uko wahagera

Gambiya: Perezida Jammeh Yatsinzwe Amatora


Umuyobozi wa Komisiyo y’igihugu y’amatora, Alieu Momarr Njai, yatangaje ko Perezida Yahya Jammeh aza kwemera ko yatsinzwe amatora y’umukuru w’igihugu yabaye ejo kuwa kane. Bisa n’aho byamutangaje kuko yabwiye abanyamakuru, ati: “Ni igitangaza pe!” Yahya Jammeh we ku giti cye ntacyo aratangaza ku mugaragaro.

Nk’uko Komisiyo imaze kubitangaza, kandida Adama Barrow ni uwa mbere n’amajwi 45.5%. Yahya Djammeh afite 36.7%. Naho kandida Mama Kandeh yabonye 17.8%. Bityo perezida wa Komisiyo, Alieu Momarr Njai, yatangaje ku mugaragaro ko Adama Barrow ari we watorewe kuyobora igihugu.

Adama Barrow afite imyaka 51 y’amavuko. Asanzwe ari umucuruzi. Yamamajwe n’amashyaka umunani yishyize hamwe. Yahya Jammeh nawe afite imyaka 51 y’amavuko. Amaze imyaka 22 ku butegetsi, ubutegetsi yafashe akoze “coup d’Etat” mu 1994. Icyo gihe yari afite ipeti rya “Lieutenant.”

Imiryango iharanira uburenganzira bwa muntu irega Yahya Jammey yagumye ku butegetsi kubera igitugu, guhutaza abatavuga rumwe nawe, iyicarubozo, no gufunga abantu ku maherere. Abandi bagiye bazimira bene wabo bakabura irengero ryabo, nk’uko iyo miryango ibyemeza. Mu 2015, Yahya Jammey yakuyeho umubare ntarengwa wa “Manda” z’umukuru w’igihugu. Manda imwe ni imyaka itanu.

XS
SM
MD
LG