Umwiyahuzi wari wambaye imyenda y’abapolisi yaturikirije bombe hafi ya minisiteri y’ingabo i Kabul muri Afghanistani kuri uyu wa mbere. Yahitanye abantu 24 ikomeretsa abarenga 90.
Televisiyo ya Afghanistan, Tolo, yatangaje ko umugaba w’ingabo mukuru muri minisiteri, generali Abdul Raziq, hamwe n’umukuru wari ushinzwe iperereza mu murwa mukuru, n’umukuru wa polise y’intara bari mu bahasize ubuzima.
Ababonye ibyabaye bavuga ko icyo gitero cyabaye ubwo abo cyakozeho abari bateraniye basuzuma ahari haturikiye igisasu gito cyari cyahatezwe.
Umuvugizi w’abatalibani, Zabihullah Mujahid, avuga ko ari inyeshyamba zagabye icyo gitero cyo kuri uyu wa mbere. Yongeyeho ko cyahitanye abantu 60 abenshi akaba ari abashinzwe umutekano ba Afghanistani. Cyakora inyeshyamba z’Abatalibani zikunze gutubura umubare zitangaza mu bitero nk’ibyo.
Prezida wa Afghanistan Ashraf Ghani yamaganye icyo gitero cyamenye amaraso. Yavuze ko abanzi ba Afghanistani batakaje ubushobozi bwabo bwo kurwanya ingabo zishinzwe umutekano n’ingabo z’igihugu none ziragaba ibitero ku mihanda minini, mu mijyi, mu misigiti, amashuri n’ahandi hantu hateranira abantu benshi.
Igitero cy’i Kabul kibaye hashize amasha ingabo z’igihugu zongeye gufata intara ikomeye y’igice kirangwamo umutekano muke cy’intara ya Kunduz mu majyaruguru y’igihugu irimo abatalibani.
Abatalibani ntacyo baravuga ku byatangajwe na guverinema.
Umuyobozi w’ingabo z’Amerika n’iza OTAN muri Afghanistan generali John Nicholson mu cyumweru gishize, yavuze ko abasilikare n’abapolisi b’Afghanistan barenga 900 bishwe mu kwezi kwa kalindwi kwonyine.