Uko wahagera

HRW Irega Imbonerakure Gufata Abagore ku Ngufu


Ishyaka riri ku butegetsi CNDD-FDD riyobowe na Pascal Nyabenda ryasohoye itangazo risaba leta gufatira ibyemezo bikaze amashyirahamwe aharanira uburenganzira bwa muntu.
Ishyaka riri ku butegetsi CNDD-FDD riyobowe na Pascal Nyabenda ryasohoye itangazo risaba leta gufatira ibyemezo bikaze amashyirahamwe aharanira uburenganzira bwa muntu.

Umuryango uharanira uburenganzira bwa muntu Human Rights Watch urarega urubyiruko rw’ishyaka CNDD-FDD riri ku butegetsi mu Burundi gusambanya no gufata abagore ku ngufu.

Raporo nshya yasohowe n’uwo muryango wo muri Amerika ivuga ko imbonerakure zakajije umurego wo gufata abagore ku ngufu kuva aho ibibazo bya politike bitangiriye mu Burundi mu mwaka wa 2015.

Iyo raporo ivuga ko, ahanini, abibasiwe ari abagore bo mu miryango y’abantu bafatwa nk'abatavuga rumwe na leta.

Abahuye n’iryo hohotera babwiye uwo muryango Human Rights Watch ko bakomeje guhura n’ingaruka mbi zituruka ku bikorwa bibi bakorewe. Izo ngaruka zirimo ibikomere, indwara zandurira mu mibonano mpuzabitsina, gusama inda udashaka n’ibindi.

Skye Wheeler, umushakashatsi wa Human Rights Watch avuga ko bamwe mu bagore bafashwe ku ngufu bavuganye, bemeza ko insoresore z’ishyaka riri ku butegetsi zabanzaga kubahambira nyuma bagasambanywa n’abagabo barenze umwe imbere y’abana babo.

Human Rights Watch ivuga ko yavuganye n’abagore 70 mu kwezi kwa gatanu uyu mwaka mu nkambi ya Nduta iri muri Tanzaniya. Nduta ni imwe mu nkambi eshatu z’impunzi zicumbikiye Abarundi 140,000.

Abo bagore babwiye uwo muryango ko bafatiwe ku ngufu hafi y’ingo zabo bakiri mu Burundi. Ikindi kandi, mu babafataga ku ngufu habagamo abasore b’Imbonerakure na bamwe mu bagabo bambaye imyenda y’igipolisi.

Kuri uyu wa kabili ishyaka riri k’ubutegetsi CNDD-FDD ryasohoye itangazo risaba leta gufatira ibyemezo bikaze amashyirahamwe aharanira uburenganzira bwa muntu. Ayo mashyirahamwe arimo Human Rights Watch, FIDH, League Iteka, Amnesty International kugera ku muyobozi Mukuru w’ishami ry’umuryango w’abibumbye ryiya ku burenganzira bwa muntu Zeid Ra’ad Al Hussein.

Iryo tangazo rya CNDD-FDD rivuga ko ayo mashyirahamwe yose nta kindi akora uretse kwambika ibara ishyaka na leta.

XS
SM
MD
LG