Inzego z’umutekano muru Afghanistan zatangaje ko zishe abarwanyi 120 ba Leta ya Kiyisilamu, barimo umuyobozi mukuru ndetse banafata ikigo uwo mutwe w’iterabwoba wari warigaruriye mu ntara ya Nangahar hafi y’umupaka na Pakistani.
Mu kiganiro n’Ijwi ry’Amerika umuyobozi muri iyo ntara yavuze ko hari abarwanyi benshi ba leta ya Kiyisilamu batawe muri yombi. Amashusho yagaragaye kuri televiziyo y’igihugu yerekanye icyo kigo n’ibibuga abo barwanyi bitorezagamo mbere yo kujya kugaba ibitero mu duce tubegereye.
Biravugwa ko icyo gitero cyagabwe kuwa gatandatu nyuma gato y’ubwicanyi bwakorewe mu murwa mukuru Kabul bwahitanye abantu 80 bari mu myigaragambyo y’amahoro.
Site ya internet yegamiye kuri uwo mutwe w’iterabwoba icyo gihe yahise itangaza ko aribo bagabye igitero mu murwa mukuru Kabul.
Mu bwishwe harimo Saad Emarati bivugwa ko ari mu batangije ibikorwa bya leta ya kiyisilamu muri Afghanistan na Pakistan.