Uko wahagera

Kenya: Barasaba ko Komisiyo y'Amatora Iseswa


Ku nshuro ya gatatu, I Nairobi muri Kenya hongeye kuba imyigaragambyo isaba impinduka muri komisiyo y’igihugu ishinzwe amatora. Abigaragambya barasaba kandi ko abayobora iyo komisiyo bakwegura.

Iyo myigaragambyo yitabiriwe cyane n’abayoboke b’amashyaka atavuga rumwe na leta yibumbiye mu ihuriro CORD.

Abigaragambya bakomeje gushinja komisiyo y’amatora kubogamira ku ihuriro ry’amashyaka ari ku butegetsi bita Jubilee Coalition, bakavuga ko iyo komisiyo idashobora gutegura amatora arangwa n’umucyo n’ubwisanzure.

James Orengo, umusenateri wa CORD yavuze ko nta matora yizewe ashobora gutegurwa na komisiyo iriho ubu. Imyigaragambyo yo kuri uyu wa mbere yaranzwe n’ubushyamirane hagati ya polisi n’abigaragambya, aho byabaye ngombwa ko polisi ikoresha ibyuka biryana mu maso kugirango iyihagarike.

Senateri Orengo yavuze ko umwe mu bigaragambya yajyanwe mu bitaro nyuma yo kuraswa n’umupolisi.

Yavuze ko iyo myigaragambyo izajya iba buri wa mbere kugeza leta yemeye kwicarana n’abatavugarumwe nayo hagamijwe impinduka muri komisiyo y’amatora.

Umwaka utaha wa 2017 ni bwo amatora y’abagize inteko n’ay'umukuru w’igihugu ateganyijwe muri Kenya.

XS
SM
MD
LG