Donald Trump umukandida w’ishyaka ry'Abarepubulika na Hillary Clinton wo mu ishyaka ry'Abademokarate ni bo bakomeje kuza kw'isonga mu matora y’ibanze ya za reta. Muri ayo matora, Abanyamerika barahitamo uzaba umukandida w'ayo mashyaka mu matora y’umukuru w’igihugu ateganyijwe mu kwezi kwa cumi na kumwe uyu mwaka.
Mu matora yabaye kuri uyu wa kabiri, Hillary Clinton wigeze kuba sekereteri wa leta, akaba n’umufasha w’umukuru w’igihugu Bill Clinton, yatsinze amatora muri leta za Florida, North Carolina, Ohio na Illinois. Imibare ya nyuma y’ibyavuye mu matora ya Missouri ntirajya ahagaragara. Aramutse atsinze amatora yo mu mpera z’uyu mwaka, Hillary Clinton yaba abaye umugore wa mbere uyoboye Leta zunze ubumwe z’Amerika. Mu ishyaka ry'Abademokarate, Hillary ahanganye na Senateri Bernie Sanders.
Mu ishyaka ry'Aberepubulika, umuherwe Donald Trump amaze kurenza kimwe cya kabili cy’amajwi akenewe muri iryo shyaka kugir ango abe umukandida ku mwanya wa perezida. Ibyo biramusaba gutsinda nibura 60 ku ijana mu matora yo muri za leta 21 zitaratora. Umukurikira mu majwi ni Senateri Ted Cruz wo muri leta ya Texas.