Ingabo za leta zunze ubumwe z’America zatangije ibitero by’indege ku birindiro by’intagondwa za etat islamique mu gihugu cya Syria.
Jeff Polls, Umuvugizi wa ministeri y’ingabo yabwiye radiyo ijwi ry’Amerika ko Amerika n’ibindi bihugu bafatanyije barimo gukoresha indege na za misili zirasirwa mu mato kurasa ku mazu n’ibikorwa by’uwo mutwe w’intagondwa.
Kugeza ubu ibihugu bimaze kumenyekana ko bifatanyije na Amerika muri ibi bitero birimo Arabiya Saudite, Emirats zunze ubumwe z’Abarabu, Qatar, Bahrain na Yordania.
Prezida Barack Obama niwe watanze amabwiriza yitangizwa ry’ibi bitero.
Kuri uyu wambere, umuyobozi w’umutwe utavuga rumwe na leta mu gihugu cya Syria yari yatangaje ko yifuza ko ibitero by’indege ku ntagondwa za etat islamique muri Syria bitangizwa vuba.
Ibi Hadi al-Bahra, yabivugiye I New York ahatangiye inama rusange y’umuryango w’abibumbye.
Yabwiye iyi nama ko uyu mutwe wagize ingwate abaturage batagira ingano mu majyaruguru ya Syria. Kuri we ngo, buri munsi uhita ntagikozwe kuri izi ntagondwa, ari agahinda gakomeye ku baturage batuye mu duce twigaruruwe n’inyeshyamba.
Muri Iraq, ibitero by’indege z’Amerika ngo bimaze guca intege etat Islamique.