Ishyaka ANC rirashaka ko Afurika y’Epfo yitandukana n’urukiko mpanabyaha mpuzamahangana. Iri shyaka riri ku buyobozi muri Afrika y’Epfo ejo ku cyumweru ryavuze ko ryabwiye guverinema ya Perezida Jacob Zuma kuva mu muryango w’ibihugu byasinye amasezerano urukiko mpanabyaha mpuzamahanga rugenderaho.
Afrika y’Epfo n’urwo rukiko ntabwo birimo kuvuga rumwe kuva Afurika y’Epfo inaniwe guta muri yombi Perezida wa Sudani Omar al-Bashir ubwo yari mu nama y’abakuru b’ibihugu y’umuryango w'Afurika yiyunze. Iyo nama yari yabereye muri Afurika y'Epfo mu kwezi kwa gatandatu.
Mu cyumweru gishize, urukiko mpanabyaha mpuzamahanga rwasabye Afurika y’Epfo gutanga ibisobanuro ku mpamvu zatumye kidata muri yombi Bashir. Edna Molewa, uyoboye akanama k’ububanyi n’amahanga mu rwego nyubahirizategeko rwa ANC avuga ko Afrika y’Epfo yari yafashe icyemezo cyayo mbere y’uko uru rukiko ruyisaba kwisobanura ku cyemezo cyayo cyo kudata muri yombi Bashir. Yavuze ko ANC, ifite impungenge k’ukuntu ibihugu bimwe yita “ibihangange”, byanga kuba abanyamuryango b’urwo rukiko, nyamara bikagira ububasha bwo gusaba ko abantu bo mu bindi bihugu boherezwa muri urwo rukiko.