Malawi yatangiye gutahura abaturage bayo bari muri Afrika y’Epfo kubera ubwicanyi n’urugomo byibasiye abanyamahanga. Abanya-Malawi babili babiguyemo. Abandi ibihumbi bitatu na 200 bavuye mu byabo muri Afrika y’Epfo.
Bus esheshatu za mbere zitwaye abatahuka bagera kuri 400 zageze mu mujyi wa Blantyre. Izindi umunani zitegerejwe muri iyi minsi. Minisitiri w’itangazamakuru wa Malawi, Kondwani Nankhumwa, yabwiye Ijwi ry’Amerika ko leta yateganirije icyo gikorwa ingengo y’imali igera ku madolari ibihumbi 450. Asobanura ko abataha nta kantu na kamwe baba bafite: batakaje ibyabo byose.
Naho imiryango iharanira uburenganzira bwa muntu yo muri Malawi yakoresheje imyigaragambyo mu murwa mukuru Lilongwe, yamagana urugomo rwibasiye abanyamahanga muri Afrika y’Epfo. Bahaye urwandiko ambasaderi w’Afrika y’Epfo, Cassandra Mokoena, nawe wabemereye ko azarwoherereza guverinoma ye bidatinze.
Billy Mayaya, wayoboye iyo myigaragambyo, yabwiye Ijwi ry’Amerika ko abanya-Malawi batangiye kujya bimukira muri Afrika y’Epfo mu 1800. Ati: “Aya mahane rero ashobora gutera ingaruka mbi muri uwo mubano, cyane cyane ko ari n’ubwa kabili bibaye. Ibikorwa by’urugomo nk’ibi na none byabaye muri Afrika y’Epfo mu 2008.”
Yemen: Intambara iraca ibintu
Umubare w’abantu bazira intambara uragenda wiyongera muri Yemen, cyane cyane kuva indege z’intambara z’ibihugu by’Abarabu zitangiye kurasa ku nyeshyamba z’aba-Houtis ku italiki ya 26 y’ukwezi gushize. Kuva kuri iyi taliki kugera uyu munsi, abamaze gupfa barabarirwa muri 551. Byibura 115 muri bo ni abana. Biratangazwa n’Umuryango w’Abibumbye.
Hagati aho, indege zakomeje kurasa ku ba-Houtis uyu munsi. Nyamara hashize iminsi itatu Arabia Saoudite, iyoboye ibyo bikorwa, itangaje ko intambara yo mu kirere irangiye.
Abantu bose bamaze kuzira intambara muri Yemen bararenga igihumbi n’ijana. Inkomere ni ibihumbi bine na 300. Naho abandi baturage barenga ibihumbi 150 bavuye mu byabo.