Uko wahagera

Urubanza rw'umunyapolitiki Ingabire Victoire Rwimuriwe mu Kwezi kwa Gatandatu.


Urubanza rw'umunyapolitiki Ingabire Victoire Rwimuriwe mu Kwezi kwa Gatandatu.

Urubanza rw'umunyapolitiki Ingabire Victoire Rwimuriwe mu Kwezi kwa Gatandatu.

Urukiko Rukuru rw’i Kigali rwaraye rwimuriye mu kwezi gutaha urubanza rwa madamu Ingabire Umuhoza Victoire ari we ubyisabiye.

Umunyepolitiki Ingabire w'ishyaka rya FDU n’abagabo bane bareganwa mu rubanza rumwe bongeye kwitaba urukiko rukuru rwa Kigali ku italiki ya 16 y’ukwezi kwa 5 mu mwaka wa 2011.

Madame Ingabire, utari kumwe n’abamwunganira, yasabye ko urubanza rwe rwimurirwa mu kwezi kwa cyenda k’uyu mwaka. Yatanze impamvu eshatu z’ingenzi. Iya mbere yatanze ni uko we n’abamwunganira batatu byabagoye cyane gutegura dosiye y’urubanza irenga impapuro ibihumbi bibiri. Iya kabiri, ntibigeze baganira mu bwisanzure, kuko igihe cyose habonekaga abantu babahagaze hejuru, babumviriza. Gusa, ntiyasobanuye abo bantu abo ari bo. Impamvu ya gatatu ni uko dosiye z’urubanza rwe zamugezeho urusorongo, kandi hari n’izindi atarabona.

Abashinjacyaha bo basobanuye ko impamvu Ingabire atanga zidashingiye ku mategeko, ahubwo ko ari urwitwazo rwo gutinza urubanza. Basobanuye ko Madamu Ingabire ataregwa wenyine, kandi ko abo baregwa hamwe bo bacyeneye kuburana vuba. Abaregwa hamwe na Mme Ingabire n’ababunganira batangarije urukiko ko nta mpamvu yo gutinza urubanza. Basabye ko urukiko kubaha itariki ya vuba, basobanura ko bakeneye ubutabera bwihuse. Abo baregwa hamwe n’umunyapolitiki Ingabire ni Maj Uwumuremyi Vital, Lt Col Nditurende Tharcisse, Lt Col Habiyaremye Noel na Capt Karuta JMV.

Bamaze kumva ingingo zitangwa n’impande zose, abacamanza batatu b’Urukiko rukuru batangaje ko urubanza rwimuriwe ku itariki ya 20 y’ukwezi kwa 6. Abo bashinjwa bitabye urukiko nta mapingu bambaye. Bari bacunzwe bikomeye cyane n’abapolisi bafite imbunda, bari batangatanze icyumba cy’urukiko mo imbere no hanze. Abinjiraga mu cyumba cy’iburanishwa nabo bose barasakwaga.

Ubushinjacyaha burega Madame Ingabire ibyaha byo kurema umutwe w’abagizi ba nabi, gukorana n’imitwe y’iterabwoba, guhungabanya umudendezo w’igihugu, gupfobya jenoside no gukurura amacakubiri. Bimwe muri ibyo birego abisangiye n’abo bashinjwa hamwe. Madame Ingabire afungiwe muri gereza nkuru ya Kigali, izwi ku izina ry’1930, kuva mu kwezi kwa 10 k’umwaka wa 2010.

XS
SM
MD
LG