Uko wahagera

Umufransa Jean Tirole Yegukanye Nobel y'Ubukungu

  • Etienne Karekezi

Jean Tirole, ni we wegukanye igihembo Nobel cy'ubukungu muri 2014

Jean Tirole, ni we wegukanye igihembo Nobel cy'ubukungu muri 2014

Umufransa Jean Tirole yatsindiye igihembo Nobel cy’ubukungu kubera ubushakashatsi yakoze ku bijyanye n’ingufu z’amasoko y’ubucuruzi no kuyagenzura.

Ikigo “The Royal Swedish Academy of Sciences” taliki ya 13 y’ukwa cumi 2014 cyatangaje ishimwe rya miliyoni imwe n’ibihumbi ijana by’amadolari. Mu gihe cy’imyaka hafi 30, bwana Tirole yakoze ubushakashatsi ku buryo amasoko ashobora kudindiza ibintu. Ni we mufrasna wa kabiri utsindiye igihembo Nobel uyu mwaka, kandi ni umwe mu mpuguke mu by’ubukungu abandi bemera cyane.

Igihembo Nobel cy’ubukungu nticyari mu bihembo Nobel by’ikubitiro byashyizweho hakurikije umurage wa Alfred Nobel mu 1895. Icyo gihembo cyongeweho mu mwaka wa 1968.

Igihembo Nobel cy’ubukungu kandi ni cyo gisoje itangazwa ry’ibihembo Nobel by’umwaka wa 2014. Mu cyumweru gishize, abajuji b’ibihembo Nobel batangaje ibihembo byo mu rwego rw’ubuvuzi, ubugenge, ubutabire, ubuvanganzo ndetse n’igihembo Nobel cy’amahoro.

Ibyo bihembo bizahabwa ababitsindiye mu muhango uzabera I Stockholm muri Suwedi taliki ya cumi y’ukwezi kwa 12. Ni wo munsi wo kwibuka itabaruka rya Alfred Nobel witabye Imana mu 1896.

XS
SM
MD
LG