Uko wahagera

Rwanda: Leta Yaburiye Abazunguzayi


Ubutegetsi bw'umujyi wa Kigali mu Rwanda bwashyizeho amabwiriza ko uzafatirwa mu bucuruzi butemewe buzwi nk'ubuzunguzayi azahanishwa amande y'ibihumbi 10000 by'amafaranga y'u Rwanda. Si abazunguzayi gusa bazacibwa ayo mande ahubwo n'abaguzi babo. Aya mabwiriza y'umujyi wa Kigali yasohotse mu igazeti ya Leta No 29bis yo kuwa 18/07/2016

Impamvu z'aya mabwiriza nk'uko ubutegetsi bwa Kigali buyasobanura burashaka guca ubwo bucuruzi butemewe. Buravuga ko ababukora badasora bigatuma bwica ubucuruzi bwemewe n'amategeko. Ubutegetsi bw'i Kigali kandi buravuga ko ubucuruzi butemewe bukurura urugomo n'ubujura bukanateza umwanda umurwa mukuru.

Kugeza ubu, hamaze kujyaho amasoko abiri I Nyabugogo mu mujyi wa Kigali ahuriramo abazunguzayi. Ni amasoko biteganyijwe ko bazayakoreramo mu gihe cy'umwaka badasora. Ariko na none mu mujyi wa Kigali haracyagaragara umubare utari muto w'abakiri mu bucuruzi bw'akajagari.

Abaganiriye n'Ijwi ry'Amerika bemeje ko babuze igishoro cyo kujyana muri ayo masoko. Hari n'abageze muri ayo masoko bigera mu masaha ya nimugoroba kubera kubura abaguzi bagasubira mu muhanda. Ku bagurira abazunguzayi bazajya bahanwa baravuga ko ariukubangamira uburenganzira bwabo. Baragaragaza ko ubuzima buhenze bagereranyije n'uburyo ibiciro bihagaze ku masoko.

Ibyegeranyo by'umuryango mpuzamahanga urengera uburenganzira bwa muntu Human Rights Watch gifite icyicaro muri Amerika gitunga agatoki u Rwanda guhonyora uburenganzira bwa muntu. Igiheruka kivuga ko u Rwanda rufunga abakene barimo abasabirizi, indaya, abazunguzayi, inzererezi n'abandi. Ku bwa Human Rights Watch u Rwanda rufata abo bose nk'abadakenewe

Ubutegetsi bw'u Rwanda bwamaganira kure ibyi byegeranyo byose. Bwikoma umuryango Human Rights Watch, buvuga ko ibyegeranyo byayo bigamije guharabika leta.

XS
SM
MD
LG