Uko wahagera

Ekwateri: Hakenewe Miliyoni 600 z'Amadolari zo Gusana


Perezida wa Ekwateri Rafael Correa avuga ko gusana ibyatikijwe n’Umutingiro w’isi wabaye kuwa gatandatu taliki 16 ukwezi kwa 4 umwaka wa 2016, bizatwara miliyari nyinshi z’amadolari. Uwo mutingito wahitanye abantu 413.

Perezida Correa yasuye umujyi wa Potoviejo uherereye mu majyaruguru ashyira uburasirazuba bw’igihugu kugirango yirebere ubwe ibyasenywe n’umutingito wari ku gipimo cya 7.8. Potoviejo hamwe n’imijyi iwegereye Manta na Pedernales ni imwe mu yakozweho cyane n’uwo mutingito n’ubwo mu gihugu hose hangiritse ibintu byinshi.

Guverinoma ya Ekwateri ivuga ko izaguza miliyoni 600 z’amadolari mu ma banki y’ibihugu byinshi, harimo Banki y’Isi yose kugirango ibashe gutunganya ibikorwa by’ubutabazi.

Ubukungu bwa Ekwateri, igihugu giherereye mu majyepfo y’Amerika kiri mu muryango w’ibihugu bikize kuri peteroli bikora ku Nyanja ya Pasifika OPEC; kiri mu bihe bitoroshye by’ubukungu biturutse ku giciro cy’ibitoro cyagamanutse ku masoko yo ku isi.

Umutingito uheruka muri Ekwateri wakomerekeyemo abantu barenga 2,500 kandi abandi basigaye batagira aho begeka umusaya.

Abahitanywe n’uwo mutingito barimo abaganga 3 b’abanyacuba, umumisiyoneri w’umugaturika w’umubikira ukomoka muri Irilande ya Ruguru. Barimo kandi abanyakanada babiri n’umunyamerika umwe.

Ibikorwa byo gushaka abarokotse mu bisigazwa by’amazu birakomeje. Batatu bakuwemo ari bazima ahahoze amaduka i Manta nyuma y’amasaha 32 bagoswe.

XS
SM
MD
LG