Uko wahagera

Isenywa ry’Amazu ya Nyakatsi mu Rwanda Nti Rivugwaho Rumwe


Inzu Nyakatsi mu Rwanda

Inzu Nyakatsi mu Rwanda

Abaturage n’abayobozi nti bavuga rumwe ku isenywa ry’amazu ya nyakatsi mu Rwanda. Mu gihe abayobozi bahigira hasi no hejuru ayo mazu, abaturage nabo nti bishimiye ibitero ubuyobozi bubagabaho

Abaturage n’abayobozi nti bavuga rumwe ku isenywa ry’amazu ya nyakatsi. Mu Rwanda, intara y’iburasirazuba niyo igaragaramo amazu menshi ya nyakatsi. Muri ibi bihe, abayobozi barahigira hasi no hejuru ayo mazu . Abaturage nabo nti bishimiye ibyo bitero ubuyobozi bubagabaho. Abavuganye n’Ijwi ry’Amerika, bise icyo gikorwa icy’ubugizi bwa nabi bugamije kubirukana mu gihugu.

Uwasanze Madamu Mukantagara mu karere ka Bugesera mu ntara y’i Burasirazuba ari imbere y’inzu ye ya nyakatsi itarasenywa. Atubwira ko kimwe na bagenzi be batishimiye kuba muri nyakatsi. Ati “tuzibamo kubera ko nta bushobozi dufite bwo kubaka inzu y’ibati cyangwa iy’amategura”. Yongeyeho ko ahora yiteguye igitero cy’ubuyobozi kandi ko kumusenyera abona ko bizongera ibibazo aho kubicyemura . Nk’uko twabibonye, bamwe iyo bamaze gusenyerwa, bahitamo kuguma muri iryo tongo, aho imvura n’izuba bibakuranwaho. Babona ubuyobozi bugiye bagasubizaho isakaro ry’ibyatsi bakabona aho bahengeka umutwe.

Mu karere ka Nyagatare, umwe mu baturage yadutangarije kuri terefone ko ho abaturage basenyerwa bamwe muri bo bahisemo kwerecyeza iy’ubuhungiro mu gihugu cya Uganda. Yagize ati “bamwe n’ubundi bazibagamo batahutse mu 1994 baturutse i Bugande, bahisemo kwisubirirayo aho kunyagirwa ku gasozi n’abana babo.”

Twagerageje kuvugana n’abayobozi b’inzego z’ibanze basenya ayo mazu nti twababona. Cyakora, ubuyobozi bw’intara y’iburasirazuba buvuga ko muri ako gace harangwamo amazu ya nyakatsi agera ku bihumbi 30 kandi ko nta n’imwe igomba gusigara yose agomba gusenywa.

XS
SM
MD
LG