Uko wahagera

Abakandida mu Matora ya Perezida muri Guinee Bamenyekanye - 2003-11-21


Muri Guinee Conakry abakandida ku mwanya wa perezida wa repuburika baraye batangiye kwiyamamariza amatora yo mu kwezi gutaha.

Abo bakandida ni babiri gusa; abandi bose bafashe icyemezo cyo kuyavamo.

Ejo ku wa 5 ni bwo urukiko rw’ikirenga rwa Guinee rwemeje abakandida ba nyuma, Perezida Lansana Conte wari usanzwe ayobora Guinee, n’uwitwa Ahmadou Bhoye Barry. Bazahangana tariki 21 z’ukwezi gutaha.

Mu ntangiriro z’uku kwezi umwe mu bari abakandida icyo gihe - uwitwa Jean Marie Dore - yatawe muri yombi azira ko yari yavuze ko ukwiyamamaza kwa Bhoye Barry ngo wari umutwe wo kugira ngo Perezida Lansana Conte yerekane ko yubahiriza demokarasi.

Icyo gihe Jean Marie Dore yari yanatangaje ko Perezida Conte - ubu ufite imyaka 69 y’amavuko - arwaye cyane k’uburyo atari kwiyamamariza indi mandat y’imyaka 7. Perezida Conte ubu afite imyaka 69 y’amavuko, kandi anarwaye diabete. Amaze imyaka 20 ayobora Guinee.

Ubundi mbere itegeko nshinga rya Guinee ryateganyaga ko nta muperezida wari kurenza mandat 2 zikurikiranya. Ryarahindutse muri 2001 rero kugira ngo Perezida Conte azashobore kwitoza indi nshuro ya 3.

Umuryango w’Ubumwe w’i Burayi wanze gufasha m’ugutegura amatora yo muri Guinee no kwoherezayo indorerezi kubera kutizera ko azabamo umucyo.



Shakira izindi nkuru z'Afurika hano.
Saba amakuru muri email yawe hano.

XS
SM
MD
LG