Muri Zambia abanyaporitiki 2 bahoze mu ishyaka riri k’ubutegetsi ku wa 3 batangarije urukiko rw’ikirenga rwaho ko bakoresheje amafaranga ya leta m’uguha ruswa abatware b’imirenge no kwandikisha posters za Perezida Levy Mwanawasa kugira ngo abashe gutorwa mu mwaka ushize.
Muri ayo matora Levy Mwanawasa ni we byavuzwe ko yatsinze. Nyamara indorerezi z’umuryango w’ubumwe bw’i Burayi zivuga ko ayo matora n’ibarura ry’amajwi byari bififitse.
Uwitwa Vernon Mwaanga, wahoze ari umunyamabanga w’ishyaka Movement for Multiparty Democracy riri k’ubutegetsi, yabwiye urukiko rw’ikirenga ko isosiyete ya leta ishinzwe amashanyarazi muri Zambia, ZESCO, ngo yatanze amadolari ibihumbi 26 nibura byo kwandikisha posters za Mwanawasa.
Uwo Vernon Mwaanga yari minisitiri w’itangazamakuru muri guverinoma ya Perezida Levy Mwanawasa kugeza ubwo Mwanawasa amwirukaniye muri guverinoma no k’ubunyamabanga mu ishyaka MMD mu ntangiriro z’uyu mwaka.
Uwitwa Michael Sata, na we wari umunyamabanga w’iryo shyaka mbere ya Mwaanga, yabwiye urwo rukiko ko yagize uruhare m’ukurimanganya amajwi kugira ngo Mwanawasa ashobore gutorwa. Sata yavuze ko ishyaka MMD riri k’ubutegetsi ngo ryakoresheje umutungo wa leta rigura imodoka 350 zakoreshejwe Perezida Mwanawasa yiyamamaza. Uwo Sana ubu ayobora ishyaka Patriotic Front Party.
Mu kwezi gushize ni bwo Perezida Levy Mwanawasa yashinje Frederick Chiluba wayoboraga Zambia mbere ye hamwe n’abandi batavuga rumwe na we kuba ngo barimo bacura umugambi wo guhimba ingirwabimenyetso byerekana uburiganya mu matora ya perezida yo mu mwaka ushize.
Hari hashize amezi makeya Perezida Levy Mwanawasa ashoboye kwumvisha inteko ishinga amategeko ya Zambia kwambura Frederick Chiluba uburenganzira bwe bwo kudakurikiranwa n’amategeko kugira ngo yisobanure ku birego bya ruswa.
Frederick Chiluba ni we wari wahitiyemo Levy Mwanawasa kugira ngo azamusimbure k’ubuyobozi bwa Zambia.