Urubanza rwa Burigadiye Gen. Wilson Gumisiriza na bagenzi be, rugeze mu bujurire bwa gisirikare.Uru rubanza rwajuririwe n' Ubushinjacyaha bwa gisirikare, rurongera rujuririrwa na ba Kapiteni John Butera na Rucyeba Dieudonne, bari bakatiwe imyaka 8 y'igifungo n'urukiko rwa gisirikare. Abo baburanyi bose bagejeje ku rukiko rukuru rwa gisirikare impamvu z'ubujurire bwabo.
Ubushinjacyaha bwa gisirikare bwabwiye urukiko rukuru rwa gisirikare ko rutishimiye impamvu zashingiweho n'urukiko rwa gisirikare mu kugira abere Burigadiye Gen. Wilson Gumisiriza na Maj. Wilson Ukwishaka , ku cyaha cy'ubufatanyacaha mu bwicanyi bukozwe mu gihe cy'intambara bwari bubakurikiranyeho.
Ubushinjacyaha bwavuze ko habayeho kwirengagiza uburemere bw'icyi cyaha, kuko mu mategeko gihanishwa igihano cya burundu. Ubushinjacyaha bwabwiye urukiko rukuru rwa gisirikare ko indi mpamvu yo kujurira kuri bwo ari impamvu z'amategeko, bitewe no kugabanyirizwa igihano byakorewe ba Capt. John Butera na Rucyeba Dieudonne, bahanishijwe imyaka 8 y'igifungo aho kuba 15 bwari bwabasabiye. Ba Capt Rucyeba na Butera nabo babwiye urukiko rukuru ko batigeze bishimira na gato igifungo cy'imyaka 8 bakatiwe. Ngo bakurikije uko bemeye icyaha, basanga bari guhanishwa nibura imyaka 2 y'igifungo.
Aba basirikare bane bakuru mu gisirikare cy'u Rwanda bakurikiranweho ubwicanyi bwakorewe abihayimana ba kiriziya gatorika 15, i Gakurazo mu Byimana, mu kwezi kwa 6 mu mwaka w'1994.
Urukiko rukuru rwa gisirikare ruzongera kuburanisha urubanza rwabo kuya 28 z'ukwezi kwa 1 mu mwaka wa 2009.