Imikino ya CAN y'abatarengeje imyaka 20 izabera i Kigali mu kwezi kwa mbere 2009. Iyo mikino y'igikombe cy'Afrika ku batarengeje imyaka 20 y'amavuko, izatangira i Kigali ku itariki ya 18 z'ukwezi kwa mbere mu mwaka wa 2009, izarangire ku itariki ya 1 z'ukwezi kwa 2 muri 2009. Ibihugu 8 by'Afrika nibyo bizahatanira icyo gikombe.
Ibyo bihugu bigabanije mu matsinda abiri. Itsinda rya mbere ririmo u Rwanda, Mali, Ghana, na Kameruni. Itsinda rya kabiri rigizwe na Nigeriya, Misiri, Afrika y'Epfo, na Cote d'Ivoire.
Ishyirahamwe ry'umupira w'amaguru mu Rwanda FERWAFA ryatangaje ko umukino wo gufungura uzahuza u Rwanda na Mali. Ukazaba ku itariki ya 18 z'ukwezi kwa 1 muri 2009, ku isaha icyenda z'amanywa. Nyuma y'uwo mukino, hazahita hakurikiraho umukino uzahuza Kameruni na Ghana, uzatangira ku isaha cyumi n'imwe z'umugoroba.
Mu rwego rwo kwitegurira iyo CAN, ibibuga bya Sitade regional i Nyamirambo, na Stade Amahoro i Remera byamaze gutunganywa. Ni nabyo gusa bizakinirwaho imikino 16 iteganijwe.
Ni ku nshuro ya mbere u Rwanda rwakira imikino yo muri urwo rwego rw'Afrika. U Rwanda rwari rumenyereye kwakira imikino y'akarere konyine ruherereyemo. Mu kwitegurira iyo CAN, ikipe y'u Rwanda y'abatarengeje imyaka 20 yagiye kwitoreza muri Tuniziya.