Uko wahagera

Urubanza rw'Abasirikare Bakuru  Bane ba RDF


Urubanza rw'abasirikare bakuru bane ba RDF rwatangiye kuburanishwa mu mizi yarwo. Abo basirikare bakurikiranweho kuba barishe abihayimana 13 i Gakurazo ni: Burigadiye Jenerali Wilson Gumisiriza, Maj. Wilson Ukwishaka, bahakana icyaha; na Capt. wakivuyemo Rucyeba Dieudonne na Capt. John Butera bo bemera icyaha.

Burigadiye Jenerali Wilson Gumisiriza na Major Ukwishaka Wilson bireguye ku italiki ya 20 z'ukwezi kwa munani mu mwaka w"i 2008, bahakana ko nta bufatanyachaha bagize mu bwicanyi bwahitanye abantu 15 i Gakurazo, harimo abihayimana 13 ba kiriziya Gatorika.

Mu kuburanisha urubanza mu mizi yarwo, ubushinjacyaha bwa gisirikare bwifashishije amashusho yerekana imiterere ya Gakurazo aho icyaha cyakorewe. Buti "si ikimenyetso, ni ayo gufasha kumenya aho icyaha cyakorewe". Ayo mashusho yibanze cyane aho abishe abo bihayimana binjiriye baza kubica, ni umuryango munini w'inzu barimo. Yanibanze kandi aho babiciye. Ubushinjacyaha bwasobanuye ko ari muri refectoire, ni ukuvuga aho bariraga, anibanda kandi aho basohokeye bamaze kubica, akaba ari mu karyango gato k'inzu barimo.

Abunganira abaregwa uko ari bane banenze ayo mafoto y'ubushinjacyaha, basaba urukiko ko rutayaha agaciro, mu gihe atagaragaza abishwe n'uko bishwe. Bavuze ko ntaho ataniye na za filimi zisanzwe.

Ibimenyetso ubushinjacyaha bweretse urukiko, ni inyandiko mvugo za ba nyiri ubwite n'abandi, harimo n'inyandiko mvugo y'umwe mu basirikare ba RDF bari barinze abo bihayimana aho i Gakurazo warokotse ubwo bwicanyi. Babiri muri bo, ba Kapiteni Rucyeba na Kapitena Butera, bireguye bemera icyaha, banagisabira n'imbabazi.

Burigadiye generali Wilson Gumisiriza na Major Ukwishaka Wilson bose uko ari babiri babwiye urukiko ko ubushinjacyaha bubarega icyaha kitumvikana. Ko nta kuntu bari kumenya ko ba Kapiteni Rucyeba Dieudona na Kapiteni John Butera bafite icyo bategura.

Urukiko rwasubitse urubanza rurushyira ku itariki ya 2 z'ukwezi kwa 9 mu mwaka w'i 2008, rukazatangira kumva abatangabuhamya.

XS
SM
MD
LG