Kw’igenekerezo rya 26 ukwezi kw’icenda 2007, abamenyeshamakuru Domitille Kiramvu, na Serges Nibizi, bo muri radiyo RPA, iradiyo y'abanyagihugu; n'abayobozi babiri b'iradiyo Isanganiro n’iradiyo Bonesha FM, Mathias Manirakiza na Corneille Nibaruta barasubiye kurengutswa ubugira gatatu imbere ya Sentare Nkuru isubiramwo imanza y'i Bujumbura.
Bubaye ubwa mbere Corneill Nibaruta arongoye radiyo Bonesha FM yitaba ubutungane mur'iyo dosiye igiye kumara hafi umwaka, ikaba yarashikanye mw'ibohero abamenyeshamakuru Serges Nibizi na Domitille Kiramvu, n'umuyobozi w’iradiyo Isanganiro, Mathias Manirakiza. Bompi uko ari batatu bagiye kurekurwa bambitswe izera na Sentare yintango yo mu gisagara ca Bujumbura. Corneille Nibaruta we akaba yari mu buhungiro.
Urubanza gwo kur'uwu wa gatatu ntirwabaye rugisasa kuko uwuburanira Corneille Nibaruta yasavye umwanya wo gusoma yitonze dosiye. Urubanza ruzosubira kumvirizwa kw'igenekerezo rya 22 ukwezi kw’icumi 2007.
Tubibutse ko Domitille Kiramvua yagirizwa kuba yaravuze inkuru ikiri mw'itohoza, mu gihe bagenzi we batatu bagirizwa gutanga inkuru yashobora gutuma umutekano uhungabana.