Uko wahagera

General Major Laurent Munyakazi mu Rukiko rw’Ubujurire


Kuwa 26 Gashyantare 2007 urukiko rukuru rwa gisirikare i Nyarugunga, mu Karere ka Kicukiro, mu Mujyi wa Kigali, rwumvise impamvu z’ubujurire bw’urubanza rwa General Major Laurent Munyakazi.

Ababurana, yaba k’uruhande rw’ubushinjacyaha bwa gisirikare no k’uruhande rwa General Munyakazi, ntibishimiye uko urubanza rwaciwe n’urukiko rwa gisirikare i Nyamirambo, bajuririra imikirize yarwo.

Urukiko rwabajije Ubushinjacyaha impamvu z’ubujurire bwabwo. Ubushinjacyaha bwavuze ko butishimiye imikirize y’urubanza. Urukiko rwa gisirikare ngo rwagiye rwirengagiza ibimenyetso bimwe, rugira Munyakazi umwere ku byaha bimwe, nk’icyo gusaka nta bubasha, ubufatanyacyaha ku cyaha cyabereye kuri gereza nkuru ya Kigali, kuyobora genocide, n’ibindi. Ubushinjacyaha busanga agomba kubihanirwa.

General Munyakazi, ari wenyine, ntawe umwunganira, yahawe umwanya wo gusobanura ingingo z’ubujurire bwe. Yabwiye urukiko ko yajuririye ibyaha urukiko rwa gisirikare rwamuhamije byatumye ahabwa igihano cyo gufungwa burundu.

General Munyakazi yasobanuriye urukiko ko, ku byaha bimwe, urukiko rwaciye urubanza ku cyaha butaregewe, ndetse ko no ku bindi habayeho gushidikanya birengera uregwa.

Ikigaragara ni uko ababuranyi bajuririye urubanza rwose nyir’izina. Urukiko rukuru rwa gisirikare ruzarusubukura kuwa 28 Gashyantare 2007.

Tubibutse ko General Major Munyakazi yakatiwe gufungwa ubuzima bwe bwose n’urukiko rwa gisirikare i Nyamirambo ku wa 16 Ugushyingo 2006. Yakatiwwe hamwe na Padiri Munyeshyaka Wenceslas. Iby’uwo mupadiri byo ntibyajuririwe kuko urubanza rwaburanishijwe adahari.

XS
SM
MD
LG