Uko wahagera

Indege ya SN Brussel Yangiwe Guhaguruka i Kanombe


Indege itwara abagenzi y’isosiyeti y’Ababirigi SN Brussel yangiwe guhaguruka ku kibuga cy’indege mpuzamahanga cy’i Kanombe i Kigali mu Rwanda kuri uyu wa kabiri tariki ya 21 Gashyantare 2006.

Ubusanzwe indege SN Brussel itwara abagenzi ibakuye ku kibuga cy’indege mpuzamahanga cy’ i Kanombe buri wa kabiri na buri wa gatandatu i sa mbiri za nijoro, ivuye i Nayirobi, muri Kenya.

Iyo ndege ivuye i Nayirobi yabujijwe guhaguruka ku kibuga cy’indege i Kanombe kubera ko yari ifite ibibazo bya tekiniki nk’uko byatangajwe n’abashinzwe iby’indege mu Rwanda. Ngo yashoboraga kugirira ibibazo mu kirere.

Ubuyobozi bwa SN Brussel bwo bwatangaje ko indege yari nzima, nta bibazo yari ifite, ndetse bibaza impamvu icyo cyemezo cyo kuyibuza guhaguruka no gukora urugendo yari ifite cyafashwe.

Abagenzi bagera kuri 200 bari muri iyo ndege baheze mu gihirahiro, bakaba bacumbikiwe mu mahoteli ya Mille Colline na Intercontinental y’i Kigali mu Rwanda.

Abashinzwe iby’indege mu Rwanda batangaje ko ibibazo bya tekiniki iyo ndege yari ifite nibikemuka SN Brussel bayireka igatwara abagenzi, igakomeza urugendo rwayo.

XS
SM
MD
LG