Uko wahagera

Syria: Ibihumbi n’Ibihumbi Mu Magereza


Leta ya Syria yonyine ibitse mu bihome byayo abantu 91,000, barimo abagore n’abana barenga ibihumbi umunani
Leta ya Syria yonyine ibitse mu bihome byayo abantu 91,000, barimo abagore n’abana barenga ibihumbi umunani

Muri Syria, abantu barenga ibihumbi ijana na cumi bari muri gereza zitandukanye za leta, iz’abayirwanya, n’iz’imitwe y’iterabwoba nk’umutwe wa Leta ya Kiyisilimu, Al-Nusra ushamikiye kuri al-Qaida.

Leta ya Syria yonyine ibitse mu bihome byayo abantu 91,000, barimo abagore n’abana barenga ibihumbi umunani.

Biratangazwa n’umuryango uharanira uburenganzira bwa muntu wigenga Syrian Network for Human Rights, wemeza ko muri aba bantu, 75 ku ijana bafatwa nk’abashimuswe ku gahato, barazimira.

Abandi bashobora kuba barishwe.

Abatavuga rumwe na leta ya Syria bohereje i Geneve mu Busuwisi intumwa zabo zisanzwe zibahagarariye mu mishyikirano y’amahoro kuganira n’intumwa yihariye y’Umuryango w’Abibumbye kuri Syria, Staffan de Mistura, kuri iki kibazo cy’abantu bafunze muri Syria, no kumusaba kugishyiramo ingufu kurushaho. Kuri bo, kubafungura cyaba ari ikimenyetso cy’uko impande zose zishaka amahoro koko.

Intambara yo muri Syria yatangiye mu kwezi kwa gatatu mu 2011. Imaze guhitana abantu barenga 400,000. Abandi barenga miliyoni 12 bavuye mu byabo cyangwa bahungira mu mahanga.

XS
SM
MD
LG